Lirica tratta dalla pubblicazione del professore Stefano Bissi dal titolo "Sciuriddi di lu me Paisi"
Ogni paisi cci avi lu so Santu,
lu prutitturi ca conforta e sana;
natri cci avemu, nostra gloria e vantu,
lu Crucifissu di Sicuiana
ch’è lu Signori di lu Tri di Maju.
E’ nni ’ stu jornu la festa cchiu granni
ca lu paìsi si la cunsacraju
cu càssaru e lu sonu di li banni.
Nesci cu la so vara tra li sciuri;
làssa la
Chiazza cu l’archi parati
e li “Furzati” firventi d’amuri,
lu cunnùcinu a spadda pi li strati.
E va davanti e indietro a fudda stisa
p’assicutari a cu è ca nun ci ha datu
pi grazii ricevuti la prummisa
pi lu maritu o lu figliu malatu.
Ma l’òmini a lu pisu di la vara
si stàncan, mischini, a la scurata,
e quannu po’ la forza ’unn’è cchiù para,
lu vannu sbattuliannu strata strata.
E’ viniratu di li genti attornu,
di chiddi dintra e di li cchiù luntanu;
vennu ’mpiduni tutti a lu so jornu
cu granni fidi e cu li ’ntorci ’manu.
Li so fidali fannu voti e offerti,
chiédinu grazii a lu Signuri a ‘nningu;
e lu Signuri ogni annu, a vrazza aperti,
cci li cuncedi a tutti a ringu a ringu.
Chista è l’usanza di la nostra genti
ca spera e prega cu l’antica fidi,
ma lu Signuri a tutti fa cuntenti,
li stringi a lu cori e li pruvvidi.
Pìcciuli e vecchi vonnu ca a la lesta
Torna lu tri di majiu cu li banni:
li nichi pi la gioia di la festa,
li vecchi, pi turnari a dudicianni.
Stefano Bissi
